கணித் துளி

கணினி பற்றி சிறு துளிகள்

ஆர்.டி.எஸ்: சிறு விளக்கம்

Posted by Clement மேல் ஜூலை 23, 2012


புதிதாக மொபைல் போன் வாங்கும் பொழுது, அதன் விவரக்குறிப்பேட்டில் எஃப்.எம் ரேடியோ ஆர்.டி.எஸ்என்று பார்த்திருப்பீர்கள். ஒரு சில மொபைல் ஃபோன்களில் ஆர்,டி.எஸ் வசதி இருக்கும். ஒரு சிலவற்றிலோ இருக்காது. சரி. அது என்ன ஆர்.டி.எஸ்? என்று நீங்கள் எனப்பொழுதாவது நினைத்திருப்பீர்களானால், அதற்காக இதோ ஒரு சிறு விளக்கம்.

Image

ஆர்.டி.எஸ். என்பது ரேடியோ டேட்டா சர்வீஸ்என்பதன் சுருக்கமாகும். ரேடியோ டேட்டா சர்வீஸ் என்பது ஒரு தகவல் தொழில்நுட்ப நெறிமுறையாம். இந்நெறிமுறையின் கரு என்னவென்றால், ரேடியோ அதாவது வானொலி அலைகளுடன் டேட்டாவையும் சேர்த்து ஒலிபாரப்புவதுதான்.

சரி புரிந்து விட்டது. ஆனால் இவ்வாறு டேட்டாவையும் சேர்த்து ஒலிபரப்புவதால் என்ன பயன்? என்று வினவுவீர்களானால் அதையும் இப்பொழுது பார்த்து விடுவோம்.

சாதாரண ரேடியோவில் ஒவ்வொறு வானொலி நிலையத்தையும் அதன் அதிர்வலை எண்ணை நினைவில் கொண்டு நாம் தெரிவு செய்ய வேண்டும். அல்லது அவ்வப்பொழுது அறிவிப்பாளரால் அறிவிக்கப்படும் வரை பொறுத்திருந்து வானொலி நிலைய பெயரை அறிந்து கொள்ள வேண்டும். அல்லவா?

ஆர்.டி.எஸ். தொழில்நுட்பத்தில், வானொலி நிலையத்தின் பெயர், அப்பொழுதைய நேரம், ஒலிபரப்பப்படும் நிகழ்ச்சி அல்லது பாடலின் விவரங்கள் போன்ற தகவல்களை (டேட்டா) ஒலிபரப்பினூடே சேர்த்து அனுப்ப முடியும். இவ்வாறு அனுப்பும் பொழுது, உங்களிடம் ஆர்.டி.எஸ் வசதியுடன் கார் ஸ்டீரியோவோ, மொபைல் ஃபோனோ இருக்குமானால், அதன் திரையில் இந்த தகவல்கள் தெரியும்.

இதெல்லாம் அடிப்படை வசதிகளே. இத்தொழில்நுட்பத்தில் வசதிகள் இன்னும் பல உண்டு.

காரில் நெடுந்தூரம் பயணம் செய்யும் பொழுது, ஒரு நிலையத்தின் எல்லையைக் கடப்பீர்களானால், அந்நிலைய அலைகளின் சக்தி குறையுமல்லவா? அப்பொழுது, அதே நிகழ்ச்சி வேறொரு நிலையத்தில் ஒலிபரப்பாகிக் கொண்டிருக்குமானால் அந்த அதிர்வலைக்கு வானொலி தன்னிச்சையாக மாறிக்கொள்ளும் வசதி; ஏதாவது ஒரு வானொலி நிலையத்தில் முக்கியமான பயண அறிவிப்பு ஒலிபரப்பானால், உங்கள் வானொலியில் வேறு எந்த நிலையம் ஒலித்துக் கொண்டிருந்தாலும், அது தானாக தற்காலிக மாற்றம் செய்யப்பட்டு பயண அறிவிப்பு ஒலிக்கப்படும் வசதி போன்ற மேம்பட்ட வசதிகளும் இத்தொழில்நுட்பத்தில் உண்டு.

இந்த மேம்பட்ட வசதிகளெல்லாம் இத்தொழில்நுட்பம் உருவான ஐரோப்பாவில் உபயோகப் படுத்தப் பட்டு வருகிறது. இந்தியாவில் ஆர்.டி.எஸ் வசதி கொண்ட நிலையங்களில், அடிப்படை வசதிகளான நிலையத்தின் பெயர், பாடல்களின் பெயர் மற்றும் விவரங்கள் உபயோகப்படுத்தப்படுகின்றது.

இந்த வசதியை நீங்கள் உங்கள் மொபைல் ஃபோனில் உபயோகிப்பதற்கு, செட்டிங்குகளில் ஆர்.டி.எஸ் வசதியை தெரிவு செய்து எனேபிள் செய்ய வேண்டியிருக்கலாம். இன்றே அதை செய்து ஆர்.டி.எஸ்ஐ உபயோகப்படுத்தி மகிழுங்களேன்!

Posted in கணினி | குறிச்சொல்லிடப்பட்டது: | 3 Comments »

EXIF என்றால் என்ன?

Posted by Clement மேல் மார்ச் 15, 2012


டிஜிட்டல் காமிராக்களில் எடுத்த புகைப் படங்களைக் கணினியில் கையாளும் பொழுது ‘EXIF information’, ‘EXIF data’ என்றெல்லாம் பார்த்திருப்பீர்கள். இந்த எக்ஸிஃப் என்றால் என்ன, இது நமக்கு எவ்வாறு பயன்படும் என்று இப்பொழுது பார்ப்போம். எக்ஸிஃப் என்பது எக்ஸ்சேஞ்சபிள் இமேஜ் ஃபைல் ஃபார்மேட் என்பதன் சுருக்கமே ஆகும். (Exchangeable Image File Format) இந்த தொழில்நுட்பத்தின் சாராம்சம் என்னவென்றால் டிஜிட்டல் முறையில் தயாரிக்கப்படும் படம் மற்றும் ஒலி கோப்புகளில், உபயோகமுள்ள மற்ற தகவல்களையும் அதாவது அந்த கோப்புகளை தயாரிக்க பயன்படுத்திய இயந்திரங்களின் செட்டிங்குகள் மற்றும் ஏனைய விஷயங்களையும் அக்கோப்புடன் சேர்த்து சேமிப்பதுதான். இதனால் ஒரு படத்தின் எக்ஸிஃப் தகவலைப் பார்த்தே அது என்றைக்கு எடுக்கப்பட்ட படம், காமிரா மாடல் என்ன, காமிராவின் பல்வேறு செட்டிங்குகளின் அளவு போன்ற விஷயங்களை அறிந்து கொள்ளலாம். சரி. புரிந்து விட்டது. ஆனால் இதனால் நமக்கு என்ன பயன் அல்லது இந்த தகவலை நாம் எவ்வாறு உபயோகப்படுத்திக் கொள்ளலாம்?

படங்களின் மேலாண்மை:

உங்கள் கணினியில் பல நூறு படங்களை சேமித்து வைத்திருப்பீர்களானால் அவற்றை தரம் பிரித்து இலகுவாக கையாள பிகாஸா, டிஜிகேம், ஐஃபோட்டோ போன்ற ஃபோட்டோ மேனேஜ்மென்ட் மென்பொருட்களை உபயோகிக்கிறீர்கள் அல்லவா? இந்த மென்பொருட்கள் உங்கள் படங்களை, பிடிக்கப்பட்ட தேதிவாரியாக (மாதவாரியாக, வருடவாரியாக) அடுக்க மற்றும் தேட இந்த எக்ஸிஃப் தகவலையே உபயோகிக்கிறது. (அதனால் நீங்கள் படங்களை எடிட் செய்து சேமிக்கும் பொழுது, இந்த எக்ஸிஃப் தகவல் அழியாமல் கவனம் கொள்ள வேண்டும்). தற்போதைய உயர்தர காமிராக்களில் படம் பிடிக்கப்பட்ட இடம் கூட ஜிபிஎஸ் வாயிலாக அறியப்பட்டு எக்ஸிஃப் தகவலில் பதியப்படுகிறது.

டிஜிட்டல் ஃபோட்டோகிராஃபி பயில:

நீங்கள் எடுக்கும் படத்தின் தரம், படம் எடுக்கப்படும் சூழலுக்கு ஏற்றவாறு காமிரா செட்டிங்குகளை அமைப்பதில் தான் பெருவாரியாக அடங்கியுள்ளது. ஒரே நாளில் பல படங்களை எடுக்கும் பொழுது, எந்த ஷாட்டிற்கு என்ன செட்டிங்கு உபயோகித்தோம் என்று நினைவில் கொள்வது கடினம். நீங்கள் எடுத்த படங்களை கணினியில் பார்த்து ஆராயும் பொழுது, இந்த எக்ஸிஃ ப் தகவலில் உள்ள காமிரா செட்டிங்குகளை ஆராய்வதன் மூலம் எந்த மாதிரியான செட்டிங்குகள் நல்ல தரமான படங்களை உருவாக்குகின்றது என்று காண முடியும். நீங்கள் எடுத்த புகைப்படங்களை மட்டுமல்லாது மற்றவர்கள் எடுத்த தரமான படங்களையும் இவ்வாறு ஆராய்வதன் மூலம், எந்தெந்த காமிராக்களில் என்னென்ன செட்டிங்குகளை உபயோகப்படுத்துகிறார்கள் என்று அறிந்து கொண்டு, நீங்களும் தரமான படங்களை எடுக்க கற்றுக் கொள்ளலாம்! எல்லாம் ஓ.கே! ஆனால் ஒரு படத்தின் எக்ஸிஃப் தகவலை எவ்வாறு காண்பது? அடடே! இது ஒன்றும் பிரமாதம் இல்லை! நீங்கள் உபயோகிக்கும் ஃபோட்டோ மேனேஜ்மென்ட் மென்பொருள் எதுவாக இருந்தாலும் அதில் இந்த வசதி நிச்சயம் இருக்கும். மேலும் உங்கள் ஆப்பரேட்டிங் சிஸ்டத்திலுள்ள ஃபைல் எக்ஸ்புளோரரின் ஃபைல் புராப்பர்டீஸ் அப்லெட் (வலது கிளிக் >> புராப்பர்டீஸ்) வாயிலாகவும் எக்ஸிஃப் தகவலை காணலாம்.

உபுண்டு லீனக்ஸின் ஃபைல் புராப்பர்டீஸ் அப்லெட்

பிறகென்ன? நீங்களும் ஒரு கைதேர்ந்த டிஜிட்டல் ஃபோட்டொகிராஃபர் ஆக வேண்டியதுதானே!

Posted in கணினி | Leave a Comment »

 
%d bloggers like this: