நண்பர் ஒருவரின் கணினியில் அவருடன் அமர்ந்து வேலை முடித்தபின் கணினியை அணைப்பதற்காக பவர் பட்டனை அழுத்தியவாறு எழுந்தேன். பதறிவிட்டார் ஒரு கணம். “என்னங்க ஷட் டவுன் பண்ணலியா? ஷட் டவுன் பண்ணாமலேயே ஆஃப் பண்ணிட்டீங்களா? அப்படியும் செய்யலாமா என்ன?” சரமாரியான கேள்விகள் கேட்டவரை அமைதிப் படுத்தி ‘அப்படியும் செய்யலாம்’ மட்டுமல்ல ‘அப்படிச் செய்வதே இலகு’ என்று விளக்கினேன்.
பவர் பட்டன்
பல ஆண்டுகளாக கணினியை உபயோகப் படுத்தியிருந்ததால் இன்னமும் பழைய நினைப்பிலேயே இருந்திருக்கிறார். முன்பெல்லாம், கணினியை அணைக்கும் பொழுது ஒழுங்காக ஷட் டவுன் செய்த பின்னரே பவர் பட்டனை அணைக்க வேண்டும். கணினி இயங்கிக் கொண்டிருக்கும் பொழுது பவர் பட்டனை தொடக்கூடாது என்றெல்லாம் சொல்லி (பயம் காட்டி?) வைத்திருப்பார்கள்.
இன்றும் அது சரிதான். ஒழுங்காக ஷட் டவுன் செய்யாமல் மின்சார இணைப்பை துண்டிக்கக் கூடாதுதான். (அதனான் தானே யு.பி.எஸ் பயன் படுத்துகிறோம்?) ஆனால் இப்பொழுது உள்ள கணினிகளின் முகப்பில் உள்ள பவர் பட்டனை கொண்டு மின்சார இணைப்பை துண்டிக்க இயலாது. ஏனென்றால், கணினி கட்டுமானத்தின் முன்னேற்றங்களால் கணினி முகப்பில் இருக்கும் பவர் பட்டனும் மாற்றப்பட்டுள்ளது (இது நடந்து பத்து வருடங்களுக்கு மேல் ஆகிவிட்டது!). உங்கள் கணினி மதர்போர்டும் கேபினெட்டும் ATX இரகமாக இருப்பின் முகப்பில் உள்ள பவர் பட்டனை அழுத்தினால் சாஃப்ட்வேர் மூலமாகவே ஷட் டவுன் (அல்லது செஃட்டிங்குக்கு ஏற்றார்போல ஹைபர்நேட்டோ அல்லது சஸ்பெண்டோ) ஆகுமே தவிர மின்சார இணைப்பு துண்டிக்கப்படாது. (கணினியில் பின்புறம் எஸ்.எம்.பி.எஸ். சுவிட்சை அணைத்தாலோ அல்லது யு.பி.எஸ். ஐ அணைத்தாலோ மின்சார இணைப்பு துண்டிக்கப் படும்.)
கணினியின் பவர் பட்டனை அழுத்தினால் என்ன நடக்கவேண்டும் என்பதை கன்ட்ரோல் பேனலில் உள்ள பவர் ஆப்ஷன்ஸ் வாயிலாக தெரிவு செய்து கொள்ளலாம்.
பவர் பட்டன் ஆப்ஷன்ஸ்
இனி நீங்களும் கணினியை அணைப்பதற்கு மவுசையும் கீபோர்டையும் தொடாமல் இலகுவாக பவர் பட்டனை உபயோகியுங்கள்!
